شعر زیبایی از استاد کریمی مراغه ای
رمضان گلدي جماعت گينه سلمان اولاجاق
دين اسلام اوجالوب خلق مسلمان اولاجاق
گله جاق غيرته فاسق اولاجاق اهل تميز
ائتديگي معصيته جمله پشيمان اولاجاق
بزنوب خار مغيلان گيره جاق گول دونونا
نخل و سنجد دوزه لوب سرو خرامان اولاجاق
مسجدون تاخجاسي حسرت قالاجاق مهر اوزونه
هره بير مهر تاپوپ بنده ي يزدان اولاجاق
بير محرمده چيخوب شاهقلي بيگ مسجددن
بيرده بو آيدا گلوب داخل ايوان اولاجاق
اون بير آييدور يومويوبدور گ…يار قلي بيگ
ايندي حمامه گئدوب شاد و خرامان اولاجاق
قولاقين دورد ائليوب مالليا آغزين آچاجاق
باشيني سيلكه ليوب واله و حيران اولاجاق
آلاجاق منبرين اطرافيني پولسوز لوطيلار
پوللولار گلسه ده بير گوشه ده پنهان اولاجاق
هر كيمين خوش سسي وار دامدا مناجات ائده جاق
آچيلوب حنجره سي بلبل خوشخوان اولاجاق
بي طهارت بالالار كه دانيشانمور سؤزوني
اولاجاق خلقه مؤذن عجب عنوان اولاجاق
ه اوچ ائودن بيري لازيمدي چيخوب وئرسين اذان
بختي قارا خروسين قيمتي ارزان اولاجاق
آي قوتولجاق باتاجاق جمله نفسلر هاموسي
نه اذانچي نه مناجاتچي نه قرآن اولاجاق
اوروجون ميل ائلينلر گئده جاقلار سفره
گزه جاق هر ياني زوار خراسان اولاجاق
قوتولور ماه مبارك عمودان گلدي خبر
بيست وهفتم گئجه سي وارد تهران اولاجاق
او آداملار كه وئرولر تومني بير قرانا
سره لرده گئجه لر قاري قرآن اولاجاق
چكه جاق رشوه پولينان پلوي دوري لره
آتاسين ياده سالوب مايل احسان اولاجاق
بش قرانلوق اته قادر دگي بيچاره كاسب
يديگي سوزمه قاتق ايچديگي آيران اولاجاق
ترك عادت ائده جك مشدينون اخلاقين عوض
خشگه بير مطلبه احوالي پريشان اولاجاق
خرمگس تك گلنه نيش ويروب اينجيده جاق
گله جك تنگه ديليندن هامي ترسان اولاجاق
دولاجاق مسجد و محراب جماعت سوري تك
الده تسبيح هامي عابد دوران اولاجاق
بينوا واعظ شهرين بوغازي يرتيلاجاق
مجلس موعظه ازبسكه فراوان اولاجاق
قره كوللوك۱ قوتولوب جان باسا جان باشقاپانا۲
نفسي تنگه دوشوب خسته و نالان اولاجاق
قوياجاقدور هره بير شيشه ي كوچك جيبينه
بش قران عطره وئريب دسته ي حيران اولاجاق
باتيروب ملچيني هر دم چكه جاق بيغلارينا
بير حنا خونچاسينا قويمالي گلدان اولاجاق
بعضي افطارين آچوب جان باساجاق قهوه لره
باشي نقله قيزيشوب تا كه اوباشدان اولاجاق
كبلائي توبه ائدوبور ياغا پي قاتمياجاق
مشهدي ايلديگي ظلمه پشيمان اولاجاق
هر كس اوز بد عمليندن ائدجك استغفار
نور ايمانيله هر قلب چراغان اولاجاق
اتحاديله علي نوكري زهرا كنيزي
گله جاق مسجده ير كثرت و طغيان اولاجاق
گله جاق دسته به دسته باجيلار موعيظيه
مسجدين هر طرفي روضه ي رضوان اولاجاق
كودري چادرا باشيندا مانيكور باشماقيلان
فر قويوب تللرينه فتنه ي دوران اولاجاق
گزه جاق كوچه لري هاردا گوراخ مرثيه وار
سوخولوب هر ائوه هر سمته شتابان اولاجاق
بعضي قيزلار كه نه الله نه پيمبر تانييوب
آيري يرلرده گزوب مرثيه عنوان اولاجاق
آنالار هر بيري بير دونبك آلوب قولتوقونا
ونگه ونگيله گلوب اوردا نوا خوان اولاجاق
ايشييوب كورپه اوشاقلار باتاجاخ فرش حصير
گله جاق تنگه ملكلرده گربزان اولاجاق
چكه جاقلار آرادان پرده كه عورت كيشنون
آراسيندا او همان پرده نگهبان اولاجاق
او طرفده كيشيلر باشه ووروب آغلياجاق
بو طرفده باجيلار گل كيمي خندان اولاجاق
سالاجاقدور اله ملت هره بير كهنه بياض
ظاهرا بنده ي پاكيزه ي سبحان اولاجاق
ائله كه چيخدي اوروجلوق گئده جاق اوز ايشينه
گينه اولكي كيمي مرشد شيطان اولاجاق
ييه جاق مال يتيمي آچاجاق ظلم اليني
قيزادوب صورتيني مثل بادمجان اولاجاق
پاكدور حسابي داداشون غم يمه سين
ائله يومجاق گوزيني داخل رضوان اولاجاق
قورخ او گوندن كسه آمالوي مقراض اجل
سينون اوسته ملك الموت نمايان اولاجاق
يار و يولداش قوياجاق تك داشين آلتيندا سني
قبر ايچينده بدنون خاكيله يكسان اولاجاق
عدل مستنطقي سندن آلاجاق توضيحات
حي و قهار ائلين عدليله ديوان اولاجاق
يديگون نفع ربالر گله جاق بورنوندان
ليره لر هر بيري آتش سوزان اولاجاق
ييغديقون ثروتي تقسيم ائده جكدور ورثه
خانمون اوزگييه همخوابه ي جانان اولاجاق
هئچ گناه اولماسا بسدور بيزه بو صوم و صلوِِِة
بو عبادت دولانوب بيزلره عصيان اولاجاق
واي او شخصه كه كتابين وئرلر صول الينه
باخوب اوز نامه ي اعمالينه گريان اولاجاق
خوش او اشخاصلرين حالينه يوم العرصات
كه شفاعتچي لري شاه شهيدان اولاجاق
نقدر ساغدي «كريمي » يازاجاق شعر و غزل
سؤزي هر عصريده هر شهريده هعلان اولاجاق
داخي بوندان بويانا شعر دوشر قيمتدن
هر يريندن دوران عالمده غزلخوان اولاجاق
هر الف بي اوخويان شاعر اولوب بانلاياجاق
هامي ديوانه اولوب صاحب ديوان اولاجاق
بار الها بيزه سن لطف ائله توفيق عمل
اولماسا خالص عمل درده نه درمان اولاجاق
يتيش امداديميزه جان يتيشنده دوداقا
اوندا كه جان قفس تن ده هراسان اولاجاق
منبع: عباس
